النقاط الواجب الانتباه اليها فى عمل الفريلانسر
- مهمة الفريلانسر هى بيع خدمة او منتج على الانترنت ، أي كانت ايه هى خدمتك او منتجك المهم يكون عندك علم بالمنتج بتاعك، مينفعش تكون مهندس مدني و تقول انا هتعلم برمجة علشان ابقى فريلانسر ، انت كده بتضيع وقت و مجهود كان لازم تبدا برمجة من وقت الكلية، لكن انت ممكن تبقى استشارى اونلاين فريلانسر.
- الفريلانسر مش مرتبط بنوع معين من الوظايف، زى ما قلت فوق الفريلانسر مجرد بيع على الانترنت، طبعاً باختلاف و حساسية نوع الوظيفة تقدر تشوف ازاى هتتصرف.
- المواقع الاونلاين المعتمدة على البايبال لا أنصح بها فى انك تدور شغل علشان تقبض منها ليه (داخل مصر)؟لان البايبال لازم يتفعل على اكونت بنكي، انا عارف انه بيتفعل ببطاقة بريد يلا بس خلي بالك لو البايبال أخد باله أنك فعلته على بطاقة البريد ممكن بكل سهولة يمسح حسابك و فلوسك تروح عليك.
- أنا بشجع انك تدخل المواقع الاونلاين المعتمدة على البايبال. ازاى و انت نافى كلامك فوق يا بشمهندس؟علشان تعرف احتياجات السوق، انا ايه اللى خلانى اطور من مجالي و اهتم بالذكاء الاصطناعي؟ بأني دخلت موقع freelancer.com و شفت مجال الماتلاب لقيته مركز على حاجات أول مرة أسمع عنها. بدأت أدور فى النت و أتعلم لحد ما وصلت للي أنا فيه الحمد لله.
- موقع خمسات حلو لو هترفع عليه بس فيه عيب و ميزة فى نفس الوقت و هى حاجة اسمها موثوقية الفريلانسر. علشان يقول على الفريلانسر أنه موثوق لازم إثبات خبرة عند طريق ان حد اشترى خدمتك قبل كده و بالتالى اعلاناتك هتكون أول إعلان و هيديلك مميزات تانية، بس لازم يكون فى حد اشترى خدمتك قبل كده، فانت هتضطر تشترى خدمة نفسك كذا مرة علشان تتقبل!
كيف تعثر على عميل؟
كده خلصنا المواقع الاونلاين؟
طيب إزاى تقدر تجيب ناس؟
من الفيسبوك و تويتر و التلجرام بانك تدور على البرنامج اللى انت متخصص فيه!
أنا متخصص فى الماتلاب بدور على مجموعات الماتلاب، بادخل أساعد الناس وأتكلم معاهم، عملت كورسات على الإنترنت، واحدة واحدة إسمى بدأ يتنشر (حوالى سنة) والناس بدأت تطلب مني شغل مقابل فلوس والحمد لله اتطورت ووصلت للي أنا فيه.
خلي بالكم: في حرامية فى كل حتة سواء تلجرام او فيسبوك، فهديلك شوية نصايح:
- ما تتعاملش مع اجانب من التلجرام.
- اعتبر اللى قدامك حرامي و ريح نفسك وإياك تتدلق عليه.
- اللي قدامك معتبرك حرامي أو مش بتفهم وتعامل بالمبدأ ده.
- مفيش ثقة بين الحرامية أكيد يعنى فلازم تدي جزء تنتوفة (بسيط جداً) من شغلك، ومتدلقش عليه.
- لو العميل قالك انا ما فتحتش الملف لسه الحق اهرب لأنه مش ناوى يديلك فلوسك!
- مفيش اتفاقيات ورقية بين الفريلانسر و العميل علشان كده لازم تمسك على العميل ذلة علشان يدفعلك فلوسك.
- العميل أخد جزء معقول من الشغل و مش عاوز يدفع؟ احرق الشغل و خليه دعاية ليك.
يعنى ايه احرق الشغل؟
عندك تصميم فيلا تعبت فيه و مدي للعميل التصميم 50% منه بحيث انه كان الدور الأول، العميل استنصح و اخد الدور الاول و جاب الدور التانى من تصاميم تانية علشان يهرب و ميدلكش الفلوس. طبعا المفروض كنت تديله الصورة مشوهة شوية، عنوانك و العلامة المائية الحاجات دي. لكن انت آمنت أنه طيب و غلبان و مش حرامي…
الحل: ارفع التصميم بالكامل على النت و قول انه كان تصميم طلب منك بس محصلش نصيب و عمل دعاية منه لشغلك!
طبعا هى بتنفع أكتر مع طلبة الجامعات و رسايل الماجستير و الدكتوراة انهم يعيطوا بدل الدموع دم.
نصيحة اضافية (مجانية)
عارف لما تفكر انك تشترى شقة او تأجر شقة مش حظك بيوديك لناس ملهمش اى لازمة فى الحياة غير انهم موبايل نوكيا connecting people، مسمين نفسهم مكتب عقارى؟
اهو دول عندنا مسمين نفسهم مكتب خدمات طلابية! دول حرامية غالباً من غير أي مهارة أو عمل، هيسرقوك ويسرقوا العميل ويا سلام بقى لو العميل دولة عربية غير مصر، هيقبضوا بالعملة الصعبة ويدوك بالجنيه المصري,
إيه عيبهم؟ لنقل أن شغلانة سعرها 100 جنيه مصري، أنت هتطلب 100 هيقلك معلش علشان ده طالب غلبان هتاخد 80 جنيه بس، ويروح للطالب و ليكن من جنسية خليجية و يقوله أنا عملت اتفاق مع المبرمج هياخد 100 ريال بس…
أحسب انت اتنصب عليك في كام؟
بس في شرط: لو أنت اتعاملت مع مكتب احترم اتفاقك.
وفي النهاية، ربنا يوفقك، و متنساش ان زكاة العلم هى نشره و تعليمه مجاناً.
هذا المقال مقدم من الكاتب ويعرض على Takea5.com بناءً على قواعد النشر على الموقع.
يمكنك المشاركة بمقالك عن طريق تعبأة الفورم في صفحة تقديم المقالات.
