كيفية استلام المدفوعات وإدارة الضرائب للفريلانسر في مصر

مقدمة

أهلاً بك يا فريلانسر! في المقال السابق ركزنا على شوية نقاط لازم تاخد بالك منها لما تقرر تبدأ رحلة الفريلانسر – خاصة في مصر.

النهاردة تعالوا نتكلم على حاجة مهمة جدا و هي: استلام الأموال طبعا!

مبدئيا منصحش حد اطلاقا بالباي بال في مصر. لو أنت من الأشخاص اللي فاتحين حساب بنكي في بلد غير مصر، فالمقال ده مش ليك.

طرق الدفع المحلية للفريلانسر في مصر

في مصر الطرق الداخلية، وتتمثل في شبكة التحويلات الداخلية والتي تشمل:

المحافظ الإلكترونية
التحويلات البنكية

ولو حضرتك عندك عملاء داخليين فقط فكده المقال انتهى!

طرق الدفع الدولية وأهمية البطاقة الضريبية

لكن لو حضرتك عندك عملاء خارجيين أيضا فهنا لازم نركز على حاجة مهمة و هي
البطاقة الضريبية. التحويلات الدولية المعتمدة على خدمة Western Union بتحتاج إلى
سبب لاستلام الأموال طبقا لقوانين البنك المركزي المصري، و نقدر نختصرها في الكام
نقطة دول:

نصائح لاستلام التحويلات الدولية عبر ويسترن يونيون

أن يكون المرسل بعلاقة من الدرجة الثالثة على الأكثر مع المستلم ( ابن-بنت-أب-أم-زوج-زوجة ) ( معرفش عن أبناء الأخ و الأخت )
ان يكون المستلم لديه بطاقة ضريبية لو لم يوجد أي علاقة

إزاي نطلع بطاقة ضريبية؟

سهل جدا. تروح لمبنى الضرائب التابع لمنطقتك و تطلب انك تطلع بطاقة ضريبية
فريلانسر (مجانا).

طبعا هتحتاج لصورة بطاقة و إثبات محل السكن سواء عقد إيجار او فاتورة هاتف
أرضي، المهم اسمك يكون موجود عليها. و في خلال أسبوعين بالكتير من تسليم كافة
المستندات بإذن الله هتطلع بطاقتك.

طلعنا البطاقة وقلنا للعميل حول الفلوس. نبِّه على العميل النقاط دي علشان تتفادى
المشاكل:

اسمك الثلاثي بالترتيب يتكتب بالإنجليزية، مينفعش العميل يكتب اول اسمين من اسمك أو أول اسم وآخر اسم، أو يتجاهل اسم و يضيف الإسم الرابع. لا، لازم الثلاثي كامل على الأقل.
طبعا لازم يختار بلد الاستلام صح.
النقطة دي جديدة: هي أن يكون اسم المرسل ثلاثي. طيب لو ثنائي؟ لازم المرسل يبعت للمستلم صورة من جواز السفر.

في طريقتين تانيين أسهل من الكلام ده:

طرق بديلة للدفع الدولي

حوالة بنكية لرقم الحساب و من اسمها مش محتاجة شرح، بس لو المرسل من السعودية قله إياك تبعت من بنك “البلاد” السعودي، لأنه هيخصم منك 150 ريال لزوم التحويل. لازم يكون عملة الاستلام بنفس عملة الحساب، لتفادي أي زعل ومشاكل.
المحافظ البنكية. أيوه المحافظ البنكية ينفع تستلم من عليها حوالات دولية بس بالجنيه المصرى فقط طبعاً.

استلمنا الحوالة البنكية الحمد لله و الف الف مبروك يا فريلانسر! استنى انت
عملت بطاقة ضريبية يبقى لازم تجهز للضرايب!!

فهم الالتزامات الضريبية للفريلانسر في مصر

أولا، هنقول مع بعض شوية نقاط مهمة قبل ما ندخل على خطوات التسجيل الضريبي على موقع مصلحة الضرائب المصرية:

تقرير الضرايب سنوي و بتسلمه من يوم 1 يناير الى يوم 30 مارس.
ليك اعفاء ضريبي 40 ألف جنيه على صافي الربح و ما فوقه يتم حساب ضريبة 10%
بشرط ان معاملاتك لا تصل الى 500 ألف جنيه سنوي.
لو وصلت نص مليون فأنت لازم تعمل فاتورة إلكترونية عن أعمالك، وتتسجل ضريبتك وقت ما تطلع الفاتورة.
إذا مكنتش بتشتغل شغل جنب الفريلانسر فالإعفاء الضريبي يزيد إلى 60 ألف جنيه.

علشان تفتح صفحة كتابة التقرير هتحتاج تدفع إلكتروني 32 و نصف جنيها مصريا – هتختار تفتح الموقع لمدة شهر واحد.

دليل خطوة بخطوة لتقديم الإقرار الضريبي

إنت بتملأ إقرار 101.
من جدول المواريث هتختار الفترة الضريبية.
املأ جدول إيرادات المهن الغير تجارية أول خانة على الشمال بعد الإسم و الفرع، إجمالي اللى كسبته خلال السنة بالجنيه المصري.
من قائمة الإقرارات التفصيلية اكتب قيمة 313 مصاريف عمومية و إدارية: هتكتب فيها إجمالي إيجار الشقة – مصاريف النت – الكهرباء – إلخ.
من الأوعية الخاضعة للضريبة هتشوف قيمة ضريبتك.
الفترة الضريبية إعمل حفظ الإقرار.